SINGAPORE (Reuters) –11:00AM, Maalintii Arbacada, suuqyada maaliyadeed ee caalamka ayaa wajahay gilgilmo xooggan, iyadoo maal-gashadayaashu bilaabeen inay iska tuuraan xitaa hantidoodii ugu badbaadsanayd – U.S. Treasuries. Sababta? Cashuuraha cusub ee Mareykanku ku soo rogay badeecooyinka dibadda, taas oo suuqyada gelisay qalalaase cusub.
Muddo maalmo ah ayaa calaamado digniin ah soo baxayeen, iyadoo farqiga u dhexeeya dulsaarka bonds-ka Mareykanka iyo heerarka sarifka ee suuqyada bangiyada uu si weyn hoos ugu dhacay. Taas micnaheedu waa in maal-gashadayaal badan bilaabeen inay iibiyaan bonds badan – taasoo ah calaamad muujinaysa cabsi baahsan.
Maxaa Ka Socda Suuqyada Maaliyadeed?
Sida laga soo xigtay falanqeeyayaal badan, hedge funds (maal-gashadayaal waaweyn oo khatar badan qaata) ayaa fure u ah dhibaatada. Waxay u adeegsadeen ‘basis trade’ – istiraatiijiyad ay ku macaashaan farqiga u dhexeeya qiimaha bonds-ka tooska ah iyo qiimaha futures-ka. Laakiin marka suuqyadu bilaabaan in ay si lama filaan ah isu beddelaan, sida hadda dhacaysa, bangiyada ay la macaamilaan hedge funds-ka waxay bilaabaan inay kordhiyaan lacagaha dammaanadda ah (margins), taasoo keenaysa in hedge funds-ka ay ku khasbanaadaan inay iska iibiyaan boosaskooda si degdeg ah.
Falanqeynta Khubarada: Maxay Ka Dhaheen?
Mark Elworthy – Bank of America, Australia:
“Tani waxay la mid tahay xasilooni darradii GFC iyo xilligii COVID. Haddii suuqyadu sidan ku sii socdaan, waxaan filan karnaa in bangiyada dhexe ay soo farageliyaan si degdeg ah.”
Kerry Craig – J.P. Morgan Asset Management, Melbourne:
“Suuqa wuxuu hadda u muuqdaa mid xoogga saaraya cabsi la xiriirta sicir bararka halkii uu horey uga fikirayay koboca dhaqaale. Waxaa laga yaabaa in xaaladdan lagu eedeeyo ‘basis trades’ ay hedge funds-ku bilaabeen inay ka baxaan.”
Wuxuu sidoo kale sheegay in dowladda Mareykanka aysan wali si buuxda u muujin dareen ku aaddan hoos u dhaca suuqyada, balse haddii arrintu saameyso xasiloonida maaliyadeed ee dalka, waxaa laga yaabaa in ay wajahaan xaalad u dhiganta “Liz Truss moment”, oo tixraac u ah dhibaatadii siyaasadeed ee UK ka dhacday kadib markii suuqyadu ka falceliyeen si xun qorshe dhaqaaled.
Mukesh Dave – Aravali Asset Management, Singapore:
“Marka bangiyada (prime brokers) ay bilaabaan inay yiraahdaan ‘waxaan rabnaa margin badan sababtoo ah suuqa aad buu u kacsan yahay,’ hedge funds-ka qaar uma babac dhigi karaan, markaasna waa inay iska iibiyaan hantidooda. Taasina hadda waa waxa socda.”
Wuxuu intaa ku daray:
“Ma jiro qof si cad u iibsanaya bonds-ka Mareykanka hadda. Xitaa bangiyada dhexe ee ajnabiga ah ma iibsanayaan, taasoo keenaysa dhibaato weyn oo xagga lacagaha caddaanka ah, qiimaha bonds-ka, iyo xitaa awoodda lagu kala iibsanayo mugga weyn ee suuqa.”
Gunaanad: Suuqyada oo Shaki Ku Jiro iyo Mustaqbal Aan La Hubin
Cashuuraha cusub ee Mareykanka wuxuu noqday qarax kale oo suuqyada caalamiga ah gilgilay. Haddii xaalada sidan ku sii socoto, waxaa suurtagal ah in ay dhalato xaalad u baahan faragelin degdeg ah oo ay sameeyaan bangiyada dhexe.
Waxa hadda la isweydiinayo ayaa ah: Yaa dib u soo celin kara kalsoonida suuqyada? Ma Dowladda Mareykanka mise Bangiga Dhexe?
Adiguna maxaad ka qabtaa? Ma la joogaa waqtigii la beddeli lahaa siyaasadda dhaqaalaha Mareykanka? Fikirkaaga ku qor qeybta faallooyinka.