BERN (Reuters) – Dadaallada lagu doonayo in Bangiga Dhexe ee Switzerland (SNB) uu ku darsado Bitcoin keydkiisa lacageed ayaa sare u kacay, iyadoo ololeyayaashu ay ku andacoonayaan in qalalaasaha dhaqaale ee caalamiga ah — oo ka dhashay canshuuraha ganacsi ee uu Mareykanka ku dhawaaqay Madaxweynaha Donald Trump — uu sare u qaaday baahida loo qabo kala-duwanaanta kaydka lacagaha dalka.
Taageerayaashu waxay bishii December bilaabeen olole afti ah si wax looga beddelo dastuurka dalka, si SNB loogu waajibo in uu Bitcoin ku daro kaydkiisa, si lamid ah dahabka.
“In Bitcoin la hayo waxay si gaar ah u macno samaynaysaa iyadoo dunidu u guurayso nidaam dhaqaale oo badan-jihays ah, halkaas oo dollarka iyo euro-ga ay daciifayaan,” ayuu yiri Luzius Meisser, oo ka tirsan guddiga shirkadda Bitcoin Suisse.
Meisser, oo la filayo inuu hadal ka jeediyo shirweynaha sanadlaha ah ee SNB ee magaalada Bern maalinta Jimcaha, wuxuu sheegay in haddii SNB ay iibsato Bitcoin, ay ka madax-bannaaneyn karto saameynta siyaasadeed ee ku saabsan qiimaha kaydka lacagaha qalaad — oo saddex-meelood labo (¾) ay yihiin dollar iyo euro.
“Siyaasiyiintu mar uun way isku dayaan inay lacag cusub daabacaan si ay u maalgeliyan qorshahooda, laakiin Bitcoin waa lacag aan lagu dhimi karin sicir-barar ka dhasha kharashaad xad-dhaaf ah,” ayuu intaas ku daray Meisser.
Switzerland waxaa si weyn loogu yaqaanaa hal-abuurnimada xagga blockchain iyo lacagaha digitalka ah, iyadoo mashaariicda sida Ethereum laga aasaasay magaalada Zug, oo loo bixiyey “Crypto Valley”.
Daraasad ay sameysay Jaamacadda Farsamada iyo Farshaxanka ee Lucerne waxay muujisay in ilaa 11% dadka Swiss-ka ah ay maal-gashi ku sameeyeen hantida crypto-ga ah.
Si kastaba ha ahaatee, SNB wali waa ka shaki qabtaa Bitcoin, iyadoo tixraacaysa is-bedbedelka qiimaha, dhibaatooyinka xagga xawilaadda iyo halisaha amni. Ilaa hadda SNB ma laha wax Bitcoin ah.
Guddoomiyaha SNB, Martin Schlegel, ayaa bishii Maarso u sheegay jariidadda Tages-Anzeiger in:
“Lacagaha digitalka ah asal ahaan waa software – waana ognahay in software kasta uu yeelan karo khaladaad iyo nuglaanshooyin.”
Dhanka kale, Yves Bennaim, oo ah abaabulaha ololaha Bitcoin Initiative, ayaa sheegay in tignoolajiyadda Bitcoin ay tahay mid ka mid ah nidaamyada IT-ga ee ugu kalsoonida badan uguna sugan ee la abuuray, isla markaana si joogto ah loo horumarinayo.
Inkastoo labadooduba ay Bitcoin hayaan, Meisser iyo Bennaim waxay sheegeen in aysan ololaha u wadin si ay u koraan maal-gashigooda gaarka ah.
Bennaim wuxuu tilmaamay in Bitcoin, oo leh suuq gaaraya ku dhowaad $2 trillion, uu yahay hantida digitalka ah ee ugu dareeraha badan uguna deggan suuqa, iyadoo malaayiin doolar lagu kala iibsanayo maalin kasta.
“Ma oranayno — ‘kaydka oo dhan Bitcoin ku shub’, balse haddii aad hayso keyd gaaraya ku dhowaad 1 trillion franc, sida SNB hadda heysto, waxay macno samaynaysaa in 1–2% lagu beddelo hanti sare u kacaysa, ammaan ah, isla markaana ay dadku doonayaan inay haystaan.”