Shirkadda Microsoft ayaa Khamiistii ku dhawaaqday inay kor u qaaday qiimaha la-talin ah ee iibka Xbox-yada iyo agabka la socda ee caalamka oo dhan, iyadoo sabab uga dhigtay kharashyada sii kordhaya ee horumarinta ciyaaraha iyo qalabka.
Qalabka Xbox Series X ayaa hadda laga iibinayaa gudaha Mareykanka $599.99, taas oo ah $100 kordhin.
Nooca 512GB Xbox Series S ayaa kor u kacay $80 wuxuuna gaaray $379.99, halka nooca 1TB uu gaaray $429.99.
Nooca cusub ee la yiraahdo 2TB Galaxy Black Edition ayaa suuqyada kusoo galay qiimo ah $729.99.
Sidoo kale, xakameeyeyaasha (controllers) iyo qalabka kale ee lagu ciyaaro ayaa lagu kordhiyay qiimo guud ahaan dunida, iyadoo headsets-ka si gaar ah qiimahooda kor loogu qaaday gudaha Mareykanka iyo Canada.
Intaas waxaa dheer, Microsoft waxay shaacisay inay sidoo kale kor u qaadi doonto qiimaha ciyaaraha cusub ee ay leedahay shirkaddu (first-party games) laga bilaabo xilliga ciidaha ee soo socda, iyadoo ciyaaruhu noqon doonaan $79.99.
Microsoft waxay sheegtay:
“Waxaan fahamsannahay in isbeddelladani ay adag yihiin, waxaana go’aanka lagu gaaray si taxaddar leh iyadoo la eegayo xaaladda suuqa iyo kharashaadka sii kordhaya ee horumarinta.”
Tani waxay noqon kartaa tallaabo keenta in qaar ka mid ah ciyaartoyda iyo iibsadayaasha ay dib uga fiirsadaan maalgelintooda mustaqbalka marka la eego sicir-bararka ciyaaraha iyo qalabka la xiriira.