Madaxweynaha Bangiga Dhexe ee Yurub (ECB), Christine Lagarde, ayaa Isniintii sheegtay in hubanti la’aanta hareysay isticmaalka doolarka sida uu hadda yahay ay fursad u noqon karto euro-ga si uu u qaato door caalami ah oo ka weyn midda uu hadda leeyahay.
Waxay sheegtay in haddii euro-ga uu helo door caalami ah oo xooggan, taasi ay u sahlayso dalalka Midowga Yurub iyo ganacsatadoodaba in ay deyn ku helaan kharash hoose, ay uga badbaadaan isbeddellada sicirka sarrifka, sidoo kalena ay iska ilaaliyaan cunaqabateynta iyo “tallaabooyin kale oo lagu khasbayo.”
Lagarde waxay xustay dhowr shardi oo muhiim u ah kor u qaadista doorka euro-ga, kuwaas oo ay kamid yihiin:
- In Midowga Yurub uu si dhab ah ugu sii dhegganaado ganacsiga furan (open trade), isla markaana uu taageero amni xooggan.
- In la helo suuqyo caasimadeed (capital markets) oo qoto dheer oo dareere leh, si loo soo jiito maalgelinta caalamiga ah.
- In la ilaaliyo sharciga iyo nidaamka (rule of law), iyo in Midowga Yurub uu si siyaasadeed isu mideeyo si uu uga hortago cadaadisyo dibadeed.
Lagarde waxay carabka ku dhufatay in xoojinta doorka euro-ga aysan ahayn kaliya arrin dhaqaale, balse ay sidoo kale tahay arrin siyaasadeed iyo mid amni.