Dacwadda sharciyeed ee la xiriirta xadgudubka tartanka ganacsiga (antitrust) ee ka dhanka ah shirkadda Meta Platforms Inc. ayaa sii socota Talaadada, kadib markii Maamulaha Guud ee Meta, Mark Zuckerberg, uu markhaati ka ahaa maxkamadda Isniintii. Waa dacwad uu Zuckerberg muddo dheer isku dayayey inuu iska fogeeyo.
Shirkadda Meta — milkiilaha Facebook, Instagram, iyo WhatsApp — waxay wajahaysaa eedeyn culus oo uga imaneysa Xafiiska Madaxweynaha Donald Trump, gaar ahaan laanta ilaalinta tartanka ee Federal Trade Commission (FTC). Dacwaddan waxay khatar gelin kartaa hantida Zuckerberg oo lagu qiyaasay $1.3 tiriliyan.
Eedeymaha Ka Dhanka ah Meta
FTC waxay sheegtay in Facebook uu noqday hanti-goosad (monopoly) ku dhex jira suuqa baraha bulshada ee “shaqsiga ah,” iyadoo ay sabab u tahay in Meta ay la wareegtay shirkado tartan geli lahaa sida Instagram iyo WhatsApp.
Qorshahan, ayay FTC leedahay, wuxuu ahaa istiraatiijiyad “iibsasho ama baabi’in” si loo xakameeyo tartanka suuqyada. Haddii FTC guuleysato, waxay u badan tahay inay maxkamadda ka codsato in Meta laga iibiyo Instagram iyo WhatsApp.
Difaaca Meta
Meta waxay ku doodday in FTC aysan si sax ah u qeexin suuqa ay ku eedeynayaan. Waxay sheegtay in Facebook, Instagram, iyo WhatsApp aysan kali ku ahayn suuqa baraha bulshada, maadaama ay jiraan tartamayaal kale sida TikTok, YouTube, X (Twitter), iyo LinkedIn.
Qareennada Meta sidoo kale waxay xuseen in FTC horay u ogolaatay iibsashada Instagram iyo WhatsApp in ka badan 10 sano ka hor.
Zuckerberg oo Ka Hadlay Maxkamadda
Zuckerberg wuxuu sheegay in dowladda ay si qaldan u qeexday suuqa ay sheegtay in Meta ka taliyo. Isagoo maxkamadda la hadlayay, ayuu yiri xiriirka qoyska iyo asxaabta waa “qayb muhiim ah” oo shirkaddu qabato, laakiin sidoo kale Meta waxay ku hawlan tahay arrimo madadaalo, waxbarasho, iyo ogaalka waxa dunida ka socda.