Qiimaha wax soo saarka ee Mareykanka (PPI) si lama filaan ah ayuu hoos ugu dhacay bishii Maarso, iyadoo sicirka shidaalka uu si weyn u dhacay. Si kastaba ha ahaatee, kharashka sare ee canshuuraha la saaray badeecadaha laga keeno dibadda ayaa la filayaa inay kordhiyaan sicir-bararka bilaha soo socda.
Sida laga soo xigtay Waaxda Shaqada ee Mareykanka, PPI-ga heerka ugu dambeeya wuxuu hoos u dhacay 0.4% bishii Maarso, kadib markii hore loogu diiwaan geliyay koror yar oo ah 0.1% bishii Febraayo.
Khubarada dhaqaalaha oo ay wareysatay Reuters ayaa Laga filayay in PPI uu kaco 0.2%, balse warbixinta cusub ayaa muujisay hoos u dhac.
Sanadkii la soo dhaafay illaa Maarso, PPI wuxuu kor u kacay 2.7% marka loo eego 3.2% bishii Febraayo.
Inkastoo Madaxweyne Trump uu dib u dhigay canshuuraha isdhaafsiga 90 maalmood, haddana wuxuu sare u qaaday cashuurta badeecadaha Shiinaha laga keeno ilaa 125%. Shiinaha isaguna wuxuu isla maalintaas kusoo rogay Mareykanka canshuur 125% ah. Waxaana wali sii jiraya canshuuraha 10% ee badeecadaha guud iyo 25% ee gaadiidka, birta, iyo aluminium-ka.
In kasta oo sicir-bararka la filayo inuu kaco, baahida gudaha oo hoos u dhacday ayaa laga yaabaa inay hoos u dhigto saameyntaas, sida laga dheehan karo warbixintii CPI ee Maarso oo muujisay qiimo dhacyo ku yimid tigidhada diyaaradaha iyo huteellada.
Canshuurahaas sare waxay wiiqeen suuqyada maaliyadeed waxayna kor u qaadeen cabsida sicir-barar. Dareenka ganacsatada iyo macaamiishuna si weyn ayuu u liitay.
Daqiiqadaha kulankii Fed-ka ee Maarso 18-19 ayaa muujiyay in go’aanada siyaasadeed ay muujinayaan walaac ka taagan in dhaqaalaha uu wajihi karo sicir-barar iyo koror la’aan dhaqaale isla waqtigaas.
Suuqyada maaliyadeed waxay filayaan in Fed-ku uu bilaabo dhimista ribada bisha Juun kadib hakintii Janaayo, iyagoo filaya hoos u dhac dhan 100 dhibcood (1%) sanadka 2025. Xilligan, heerka ribada Fed-ku waa inta u dhaxaysa 4.25% ilaa 4.50%.